ASK Arkitektar

Undanfarnar vikur hefur verið unnið að því að reisa leikhús fyrir 800 gesti í Vetrargarði Smáralindar. Söngleikurinn "Fame" var frumsýndur þar í gær.

Vetrargarður Smáralindar var á sínum tíma hannaður sem fjölnotarými fyrir ýmis konar afþreyingu. Á þeim 2-3 árum sem liðin eru frá opnun Smáralindar hefur enda farið fram ótrúlega fjölbreytt flóra viðburða ss. sýningar af ýmsum toga, tónleikar, matreiðslukeppni og hreystikeppni. Stórir sjónvarpsviðburðir hafa einnig farið fram í Vetrargarðinum ss. spurningakeppni framhaldsskólanna og Idol-keppnin sl. vetur. 

Nú hefur verið bætt í þessa flóru viðburða með því að byggja leikhús í Vetrargarðinum. Um er að ræða laust og færanlegt leikhús sem útfært er þannig að hægt er að taka það niður og setja upp á 2-3 dögum. Hönnun leikhússins var unnin af ASK í samvinnu við starfsfólk Smáralindar og Sviðsmynda ehf sem sáu um smíði og uppsetningu skermveggja umhverfis leikhúsið.